Претседателката на Комисијата за хартии од вредност М-р Бујаре Абази, на 18 и 19 ноември 2025 година учествуваше на серија настани организирани од Меѓународната организација на Комисии на хартии од вредност (IOSCO), кои се одржаа во Малта, a кои обединија носители на политики, претседатели на регулатори и експерти од Европа, Блискиот Исток, Азија, Африка и Латинска Америка. Целта: размена на искуства и унапредување на пазарната стабилност и на регулаторните практики.
Клучните дискусии на конференцијата која ја организираше Агенцијата за финансиски услуги на Малта, а  се одржа непосредно пред состаноците на IOSCO Комитетот за раст и пазари во развој (GEMC) и Европскиот регионален комитет (ERC)  се однесуваа на економските ризици, трансформацијата на пазарите на капитал, дигитализацијата, употребата на вештачка интелигенција во надзорот, регулацијата на криптовалутите и на глобалните стандарди за известување за одржливост. Посебен акцент беше ставен на улогата на регулаторите во создавање одржливи и транспарентни пазари кои придонесуваат за економски раст. Конференцијата  ја  отвори  Заменик-премиерот и Министер за надворешни работи и туризам на Малта, д-р Иан Борг, по што следеше видео-обраќање од Министерот за финансии, Клајд Каруана. Генералниот секретар на IOSCO, Родриго Буенавентура истакна: „Технологијата го трансформира финансискиот систем. IOSCO работи на одговорна примена на вештачката интелигенција, регулација на крипто валутите и јакнење на пазарната отпорност, со силен фокус на земјите во развој и заштитата на инвеститорите.“


На 19 ноември се одржа Пленарниот состанок на Growth and Emerging Markets Committee (GEMC), кој обединува над 90 земји-членки и има важна улога во поддршката на развојот на пазарите на капитал  во земјите во развој. Темите опфатија финансиска инклузија, финтек иновации, токенизација, пазарна инфраструктура, заштита на инвеститорите и привлекување капитал.



На маргините на настаните, Претседателката нан КХВ М-р Бујаре Абази оствари средба со Генералниот секретар на IOSCO, Родриго Буенавентура, посветена на зајакнување на регулаторната соработка, учество на КХВ во иницијативите за градење капацитети и развој на современи надзорни технологии во домашниот финансиски сектор.



Ваквото учество на КХВ на овие настани претставува дел од континуираната заложба за усогласување со меѓународните регулаторни стандарди, зголемување на транспарентноста и интегритетот на пазарите, унапредување на заштитата на инвеститорите и развој на современи надзорни алатки кои ги следат глобалните иновации.