На 27 јануари 2023 година, во Брисел, се одржа билатералниот скрининг, за Поглавје 6-Право на трговските друштва, како дел од Кластерот 2-Внатрешен пазар, организиран од страна на Европската комисија.

Претставниците на Комисијата за хартии од вредност, зедоа активно учество во рамки на Работната група за Поглавјето-6, на начин што, на самиот скрининг, детално се презентирани информации од досегашните напори, за транспонирање и имплементирање на законодавството на Европската унија, особено во делот на основањето и барањата поврзани со одржувањето и промената на основачкиот капитал кај акционерските друштва, домашните и прекугранични статусни промени, како и корпоративното управување, преку донесувањето на новиот Кодекс за корпоративно управување.  

Во однос на правото на трговските друштва, истакнато е дека е неопходно дополнително усогласување со најновото законодавство на Европската унија, кое се однесува на: дигитализација на процесите, прекуграничните операции, како и со правилата за поттикнување на долгорочно ангажирање на акционерите. За таа цел, во постапка е изготвување нов Закон за трговските друштва, во рамките на ИПА проект „Зајакнување на внатрешниот пазар“, финансиран од страна на Европската унија. Главните очекувања од донесувањето на овој закон е да се обезбеди поедноставно, побрзо и поефикасно формирање на компанија и обезбедување сеопфатни информации без бариери, да се подобри корпоративното управување во компаниите чии хартии од вредност се тргуваат на регулирани пазари, да се подобри заштитата за акционерите и другите засегнати страни, со особен интерес за компаниите, како и за вработените и за доверителите, бизнисот да стане поефикасен, конкурентен и одржлив на долг рок и да се поттикнат компаниите со седиште во нашата земја, да соработуваат со компании од земјите на ЕУ

Во делот на транспарентноста, истакнато е дека Законот за хартии од вредност и Правилата за котација на Македонската берза се дизајнирани да бидат во согласност со барањата на ЕУ Директивата за транспарентност. Тоа значи дека на инвеститорите им се обезбедуваат информации за издавачите чии хартии од вредност котираат на Берзата, и тоа периодични финансиски информации, како и ценовно чувствителни информации, вклучувајќи ги и информациите за поседување значителен процент од правата на глас. Објавувањето на регулираните информации се обезбедува на недискриминаторска основа и на начин кој обезбедува брз пристап до тие информации, преку Системот за електронски информации за котирани друштва (СЕИ-НЕТ) на Македонската берза.