Успешно заврши четиридневната Тренинг програма за финансиски регулативи 2025, реализирана во соработка помеѓу Комисијата за хартии од вредност и Европската банка за обнова и развој. Настанот од 18 до 21 ноември во Скопје на едно место ги собра  експертите, претставници на финансиски институции, издавачи и учесници од пазарот на капитал, кои имаа можност да се запознаат со најновите регулаторни трендови и европски стандарди.

Програмата опфати специјализирани модули посветени на регулативите CSDR, MiFID II и MAR, при што учесниците се продлабочија во статусот и обврските на европските централни депозитари, клучните концепти на MiFID II, пазарната инфраструктура, правилата за работење, како и спречувањето на злоупотреби на пазарот и обврските на издавачите. Обуката беше збогатена со практични примери, анализа на критични точ­ки во примената на регулативите и дискусии со искусните тренери.

На завршниот ден, со свое обраќање се обрати претседателката на Комисијата за хартии од вредност, М-р Бујаре Абази која истакна дека јакнењето на капацитетите и континуираното надградување на знаењето на пазарните учесници претставуваат важен столб за развој на стабилен и транспарентен пазар на капитал. „ CSDR, MiFID II и MAR – не се само дел од европското законодавство, туку одраз на вредности што ја градат довербата, транспарентноста и одговорноста.  Јасно е дека вистинската сила на регулативите не лежи само во нивните норми, туку во начинот на нивната примена, во луѓето кои ги спроведуваат и во институциите што стојат зад нив, нагласи Абази во своето обраќање.  Според неа, Комисијата за хартии од вредност ќе продолжи со континуирана поддршка на реформите на пазарот на хартии од вредност, промовирање на добри практики и поттикнување на регионална соработка, за да се создаде пазар кој не е изолиран, туку интегриран со европските текови и со принципите и стандардите на IOSCO.

Четиридневната програма опфати важни сегменти од европската регулатива – од инфраструктура  кон регулација  до етика и интегритет. Настанот заврши со размена на искуства, кои придонесоа за дополнително продлабочување на разбирањето и практичната примена на регулативите.