Во организација на Комисијата за хартии од вредност на Република Северна Македонија и Универзитетот „Мајка Тереза“во Скопје, денес официјално започна тридневната Летна школа за вовед во финансиските пазари и хартии од вредност, наменета за студентите кои се заинтересирани за функционирањето на финансиските пазари и инвестирањето.

Летната школа ја отворија претседателката на Комисијата за хартии од вредност, м-р Бујаре Абази и проректорот за финансии, инвестиции и развој, доц. д-р Бујамин Бела на Универзитетот „Мајка Тереза “во Скопјe кои ја истакнаа важноста на финансиската едукација и потребата од континуирано унапредување на знаењата на младите во областа на финансиските пазари.

Во своето обраќање, претседателката Абази нагласи дека финансиската писменост претставува важен предуслов за развој на ефикасен, транспарентен и доверлив пазар на капитал, истакнувајќи дека младите генерации се носители на идните промени и развојни процеси.

„Инвестирањето во знаење е најсигурната инвестиција. Преку вакви образовни иницијативи создаваме генерации кои ќе носат информирани финансиски одлуки и ќе придонесуваат за развојот на домашниот пазар на капитал“, истакна Абази.

Од страна на проректорот Бела беше потенцирано дека летната школа претставува успешен пример за соработка меѓу академската заедница и институциите, овозможувајќи им на студентите да стекнат практични знаења и вештини кои се неопходни за современиот финансиски сектор.

Првиот ден од програмата беше посветен на основите на финансиските пазари и финансиските инструменти. Преку предавања, презентации и интерактивни дискусии, учесниците имаа можност да ги продлабочат своите познавања за функционирањето на пазарите на капитал и улогата на финансиските инструменти во современите економии.

Во текот на вториот ден ќе бидат обработени теми поврзани со регулаторното опкружување, етиката во финансискиот сектор и практичните аспекти на тргувањето со хартии од вредност, додека последниот ден ќе биде посветен на анализа на пазарите, инвестициски стратегии и управување со ризици.

Со реализацијата на оваа летна школа, Комисијата за хартии од вредност продолжува активно да придонесува кон јакнењето на финансиската писменост и развојот на идни професионалци во областа на пазарот на капитал и инвестирањето.