На 18.11.2025 годна во организација на Комисијата за хартии од вредност на Република Северна Македонија и Европската Банка за обнова и развој во рамки на EU Financial Regulation 2025 Training Programme, започна четиридневната работилница посветена на најрелевантните европски директиви во областа на поазарот на капитал.

Настанот го отвори Внатрешниот комисионер на Комисијата за хартии од вредност на Република Северна Македонија, М-р Васко Пејков, кој упати краток осврт на значењето на модерните регулаторни практики и важноста од нивна навремена примена. Воедно тој истакна дека: “Оваа програма е дел од заедничките напори на Комисијата и ЕБРД да се засили процесот на усогласување со европските стандарди и да се обезбеди системско разбирање на регулативите кои го обликуваат пазарот на капитал во Европската Унија”.

Во текот на четиридневната работилница посредниците на пазарот на капитал, издавачите и акционерите имаат можност да се запознаат со практичната имплементација на најважните директиви и регулативи од областа на пазарот на капитал во Еропската Унија– CSDR, MiFID II и MAR и преку интерактивни дискусии да разменат искуства за предизвиците кои ќе ги очекуваат во наредниот период во однос на примената на европските стандарди.

Преку ова работилница Комисијата за хартии од вредност ја потврдува определбата за развој и зајакнување на институционалните капацитети, како и за стабилност и транспарентност на пазарот на капитал.