​      Претседателот на Комисијата за хартии од вредност на Република Македонија М-р Елизабета Чингаровска учествуваше на Европскиот регионален Комитет на IOSCO што се одржа 29 јануари,2016 година во Стокхолм, Шведска. Се дискутираше за неколку теми кои се од интерес на регулаторните тела на пазарите на хартии од вредност во Европа како што се продлабочување на соработката во рамките на предлогот за регионални тела за соработка, размена на податоци и информации врз основа на Мултилатералниот Меморандум за соработка на IOSCO, зголемување на транспарентноста во работењето на комитетите на IOSCO, и.т.н. Една од целите кои треба да ги оствари IOSCO во наредниот период е да помогне во зајакнување на капацитетите на регулаторите во различни делови на Европа, преку создавање и финансиска помош на регионални тела за зајакнување на капацитетите, кои ќе организираат работилници, форуми, тркалезни маси на кои ќе се обработуваат теми од интерес на соодветниот регион и од интерес и на помалите регулатори. Во однос на размената на податоци и информации, беше констатирано дека MMoU на IOSCO претставува добра основа за соработка помеѓу регулаторите во светот при размена на информации, кои се потребни за решавање на различни случаи. Доказ за ефикасноста на примената на Меморандумот е постојаното зголемување на бројот на земји-потписнички, како и на бројот на барања кои земјите ги испраќаат (ако во 2006 тој број бил 527 барања, во 2014 биле поднесени 3080 барања). Како прашање кое во иднина ќе треба да биде предмет на детални анализи и дискусии и кое ќе влијае на продлабочување на соработката помеѓу регулаторите беше истакнат начинот на супервизија на тргувањето со биткоини и обелоденувањето на информации за регистрите на трансакции со биткоини (bitcoin ledger). На состанокот, кој беше под покровителство на регулаторот на пазарот на хартии од вредност од Шведска присуствуваа претставници на повеќе од 30 регулаторни тела на пазарите на хартии од вредност во Европа, ESMA и на Руската Федерација.​​​